എസ്-പ്രസ്സോയുടെ 10,634 യൂണിറ്റുകള്‍ വില്‍പ്പന നടത്തിയതായി മാരുതി സുസുക്കി

2019 ഒക്ടോബർ മാസത്തിൽ എസ്-പ്രസ്സോയുടെ 10,634 യൂണിറ്റുകൾ വിൽപ്പന നടത്തിയതായി പ്രഖ്യാപിച്ച് മാരുതി സുസുക്കി. കഴിഞ്ഞ മാസം മാരുതിയുടെ ശ്രേണിയിൽ നിന്ന് ഏറ്റവുമധികം വിൽപ്പന നടത്തിയ 10 മോഡലുകളുടെ പട്ടികയിൽ ഇടംപിടിക്കാനും എസ്-പ്രെസ്സോയ്ക്ക് സാധിച്ചു.

ആൾട്ടോ, സ്വിഫ്റ്റ്, ഡിസയർ തുടങ്ങിയ മോഡലുകളാണ് പതിവുപോലെ ആദ്യ മൂന്ന് സ്ഥാനങ്ങളിൽ ഉള്ളത്. ഏറ്റവും കൂടുതൽ വിറ്റഴിക്കപ്പെടുന്ന വാഹനങ്ങളുടെ പ്രതിമാസ വിൽപ്പന കണക്കുകളിൽ ഇത് രണ്ടാം തവണയാണ് എസ്-പ്രെസ്സോ ഇടംപിടിക്കുന്നത്. 2019 സെപ്റ്റംബർ മാസത്തിലെ പട്ടികയിലും 5,000 യൂണിറ്റുകൾ വിറ്റഴിച്ച് എട്ടാം സ്ഥാനത്ത് എത്തിയിരുന്നു.

എൻട്രി ലെവൽ വിഭാഗത്തിൽ ചുരുങ്ങിയ കാലം കൊണ്ട് എസ്-പ്രെസ്സോയ്ക്ക് സ്വന്തമായൊരും സ്വാനം നേടിയെടുക്കാൻ സാധിച്ചെന്ന് വിപണിയിലെ എസ്-പ്രെസ്സോയുടെ പ്രകടനത്തെക്കുറിച്ച് സംസാരിച്ച മാരുതി സുസുക്കി ഇന്ത്യ ലിമിറ്റഡ് എക്സിക്യൂട്ടീവ് ഡയറക്ടർ (മാർക്കറ്റിംഗ് & സെയിൽസ്) ശശാങ്ക് ശ്രീവാസ്തവ പറഞ്ഞു.

ഈ ശ്രേണിയിലെ വ്യത്യസ്‌ത ഉപഭോക്താക്കൾക്ക് സവിശേഷ അനുഭവങ്ങൾ നൽകുന്നതിന് എസ്-പ്രെസ്സോ വേറിട്ടുനിൽക്കുന്നു. വാഹനത്തിന് മികച്ച പ്രതികരണങ്ങൾ ലഭിക്കുന്നതിൽ തങ്ങൾ ആവേശഭരിതരാണെന്നും ഒപ്പം എസ്-പ്രെസ്സോയുടെ ഉപഭോക്താക്കളുടെ വിശ്വാസത്തിന് നന്ദി അറിയിക്കുന്നതായും ശശാങ്ക് ശ്രീവാസ്തവ കൂട്ടിച്ചേർത്തു.

വിപണിയിലെ ഏറ്റവും പുതിയ ബജറ്റ് കാറായ എസ്-പ്രെസ്സോ ബിഎസ്-VI കംപ്ലയിന്റ് 1.0 ലിറ്റർ K10 പെട്രോൾ എഞ്ചിനാണ് അവതരിപ്പിക്കുന്നത്. ഇത് വരും മാസങ്ങളിൽ മറ്റ് മാരുതി കാറുകളിലേക്ക് പ്രവേശിക്കാൻ ഒരുങ്ങുന്നു.

എസ്-പ്രെസ്സോയിലെ 1.0 ലിറ്റർ ബിഎസ്-VI പെട്രോൾ എഞ്ചിൻ 67 bhp കരുത്തിൽ 90 Nm torque ആണ് ഉത്പാദിപ്പിക്കുന്നത്. ഹൈ-റൈഡിംഗ് ഹാച്ച്ബാക്ക് നാല് വകഭേദങ്ങളിൽ തെരഞ്ഞെടുക്കാം. ഉയർന്ന വകഭേദങ്ങൾക്ക് എഎംടി ഗിയർബോക്‌സ് ഓപ്ഷനും ലഭ്യമാകും.

റെനോ ക്വിഡിന്റെ എതിരാളിയായ എസ്-പ്രെസ്സോ ഫ്യൂച്ചർ എസ് കൺസെപ്റ്റിന്റെ രൂപത്തിൽ കണ്ട എസ്‌യുവി പ്രചോദിത സ്റ്റൈലിംഗാണ് അവതരിപ്പിക്കുന്നത്. വിറ്റാര ബ്രെസ്സയിൽ നിന്ന് കടമെടുത്ത ഡിസൈൻ സൂചകങ്ങളാണ് മുൻഭാഗത്തെ ഗ്രില്ലിന്റെ കാര്യത്തിലും എസ്-പ്രെസ്സോയ്ക്കുള്ളത്.

സുരക്ഷാ സവിശേഷതകളിൽ ഇബിഡിയോടു കൂടിയ എബി‌എസ് , ഡ്രൈവർ സൈഡ് എയർബാഗ്, റിവേഴ്സ് പാർക്കിംഗ് സെൻസറുകൾ, സ്പീഡ് അലേർട്ട് സിസ്റ്റം, സീറ്റ് ബെൽറ്റ് റിമൈൻഡറുകൾ എന്നിവ ഉൾപ്പെടുന്നു. 3.69 ലക്ഷം രൂപ മുതലാണ് വാഹനത്തിന്റെ എക്സ്ഷോറൂം വില ആരംഭിക്കുന്നത്.

വിപണിയിലെ സ്വീകാര്യതകണക്കിലെടുത്ത് തങ്ങളുടെ ഏറ്റവും പുതിയ മൈക്രോ എസ്‌യുവി മോഡലായ എസ്-പ്രെസ്സോയുടെ സിഎൻജി എഞ്ചിൻ പതിപ്പും വിപണിയിലെത്തിക്കാൻ ഒരുങ്ങുകയാണ്. സിഎൻജി പതിപ്പ് ഇതിനോടകം തന്നെ ഇന്ത്യൻ നിരത്തുകളിൽ പരീക്ഷണം ഓട്ടം നടത്തിയിട്ടുണ്ട്. 1.0 ലിറ്റർ സിഎൻജി എഞ്ചിനാകും എസ്-പ്രെസ്സോയിൽ മാരുതി വാഗ്ദാനം ചെയ്യുക.

Comments are closed.