Ultimate magazine theme for WordPress.

WR-V ക്രോസ്ഓവറിന്റെ ബിഎസ്-VI പതിപ്പ് പുറത്തിറക്കാന്‍ ഒരുങ്ങി ഹോണ്ട

WR-V ക്രോസ്ഓവറിന്റെ ബിഎസ്-VI പതിപ്പ് പുറത്തിറക്കാൻ ഒരുങ്ങുകയാണ് ജാപ്പനീസ് വാഹന നിർമാതാക്കളായ ഹോണ്ട. നിലവിൽ ഹോണ്ട തങ്ങളുടെ സിറ്റി സെഡാനെ മാത്രമാണ് പുതിയ മലിനീകരണ ചട്ടങ്ങൾക്ക് അനുസൃതമായി നവീകരിച്ച് വിപണിയിൽ എത്തിച്ചിട്ടുള്ളൂ.

എഞ്ചിൻ പരിഷ്ക്കരണത്തിനൊപ്പം ചെറിയ കോസ്മെറ്റിക് നവീകരണങ്ങളും വാഹനത്തിൽ ഇടംപിടിക്കും. 2020 ഹോണ്ട WR-V ബിഎസ്-VI നായുള്ള ബുക്കിംഗ് ആരംഭിച്ചതായി കമ്പനി അറിയിച്ചു. 21,000 രൂപ ബുക്കിംഗ് തുകയായി ഡീലർഷിപ്പുകൾ ഈടാക്കുന്നത്. ഹോണ്ട ജാസ് പ്രീമിയം ഹാച്ച്ബാക്കിന്റെ അതേ പ്ലാറ്റ്ഫോമിനെ അടിസ്ഥാനമാക്കി എത്തുന്ന ക്രോസ്ഓവറിനെ 2017-ലാണ് ഇന്ത്യൻ വിപണിയിൽ അവതരിപ്പിക്കുന്നത്.

ജാപ്പനീസ് ബ്രാൻഡ് പ്രതീക്ഷിച്ചതുപോലെ ഒരു വിജയം ഒരിക്കലും ഇന്ത്യൻ വിപണിയിൽ നിന്ന് WR-V ക്ക് നേടാൻ സാധിച്ചില്ല. മാരുതി സുസുക്കി വിറ്റാര ബ്രെസ തുടങ്ങിയ മോഡലുകൾ അരങ്ങുവാഴുന്ന കോംപാക്‌ട് എസ്‌യുവി ശ്രേണിയിൽ നിന്നും ഒരു ഭേദപ്പെട്ട വിൽപ്പന നേടുകയെന്ന ലക്ഷ്യവുമായാണ് ക്രോസ്ഓവർ ലുക്കുള്ള വാഹനമെത്തിയത്.

എന്നാൽ ഈ വിഭാഗത്തിൽ മാരുതിയുടെ തന്നെ എസ്-ക്രോസ് പോലും ചുവടുറപ്പിക്കാൻ പ്രയാസപ്പെട്ടു. പോരാത്തതിന് മഹീന്ദ്ര XUV300, ടാറ്റ നെക്സോൺ, ഹ്യുണ്ടായി വെന്യു എന്നീ മോഡലുകൾ കൂടി എത്തിയതോടെ ഹോണ്ട അമ്പേ പരാജയപ്പെടുകയായിരുന്നു.

എന്നാൽ ഹോണ്ടയ്ക്ക് മേൽകൈ നൽകുന്ന ഒരു ഘടകമായിരുന്നു പെട്രോൾ, ഡീസൽ വകഭേദങ്ങളിൽ WR-V അവതരിപ്പിച്ചത്. നിലിവിലെ മോഡലിനെ അപേക്ഷിച്ച് 2020 ഫെയ്‌സ്‌ലിഫ്റ്റിൽ പുതിയ മുൻ ബമ്പർ ഇടംപിടിക്കും. അതോടൊപ്പം ചുവടെയുള്ള കറുത്ത ക്ലാഡിംഗ്, ഫോഗ് ലാമ്പ് ഹൗസിംഗുകളിലെ കറുത്ത ഉൾപ്പെടുത്തലുകൾ എന്നിവ കാറിന്റെ ആകർഷണീയത കൂട്ടാൻ സഹായിക്കും.

കൂടാതെ, നിലവിലെ മോഡലിന്റെ ഹണികോമ്പ് ഗ്രില്ലും തിരശ്ചീന സ്ലേറ്റുകളുള്ള ഒരു പുതിയ യൂണിറ്റിന് വഴിയൊരുക്കിയിട്ടുണ്ട്. ബമ്പർ ഒരു സ്‌കിഡ് പ്ലേറ്റും ഉൾപ്പെടുത്തിയിട്ടുണ്ട്. പരിഷ്ക്കരിച്ച മോഡലിൽ എൽഇഡി ഹെഡ്‌ലാമ്പുകൾ അവതരിപ്പിക്കും. മുമ്പത്തെപ്പോലെ തന്നെ 2020 ഹോണ്ട WR-V 1.2 ലിറ്റർ പെട്രോളും 1.5 ലിറ്റർ ടർബോചാർജ്‌ഡ് ഡീസൽ എഞ്ചിനും വാഗ്‌ദാനം ചെയ്യും. എഞ്ചിന്റെ പവർ ഔട്ട്പുട്ടുകളെ കുറിച്ച് കമ്പനി ഔദ്യോഗിക വിവരങ്ങളൊന്നും പുറത്തുവിട്ടിട്ടില്ല.

നിലവിലെ ഹോണ്ട WR-V ബിഎസ്-IV മോഡൽ I-VTEC പെട്രോൾ എഞ്ചിൻ 89 bhp, 110 Nm torque എന്നിവയാണ് ഉത്പാദിപ്പിക്കുന്നത്. 1.5 ലിറ്റർ ഐ-ഡിടിഇസി ഡീസൽ യൂണിറ്റ് 99 bhp കരുത്തും 200 Nm torque ഉം ആണ് ഉത്പാദിപ്പിക്കുന്നത്. രണ്ട് യൂണിറ്റുകളും അഞ്ച് സ്പീഡ് മാനുവൽ ഗിയർബോക്‌സുമായി ജോടിയാക്കിയിരിക്കുന്നു. ഓട്ടോമാറ്റിക് ഓപ്ഷൻ ഹോണ്ട വാഗ്ദാനം ചെയ്യുന്നില്ല എന്നത് ശ്രദ്ധേയമാണ്.

Comments are closed.