കലിനനിന്റെ പുതിയ ബ്ലാക്ക് ബാഡ്ജ് പതിപ്പിനെ ഇന്ത്യയില്‍ അവതരിപ്പിച്ച് റോള്‍സ് റോയ്‌സ്

ലക്ഷ്വറി എസ്‌യുവി മോഡലായ കലിനനിന്റെ പുതിയ ബ്ലാക്ക് ബാഡ്ജ് പതിപ്പിനെ ഇന്ത്യയില്‍ അവതരിപ്പിച്ച് ബ്രിട്ടീഷ് വാഹന നിര്‍മ്മാതാക്കളായ റോള്‍സ് റോയ്സ്. 8.2 കോടി രൂപയാണ് പുതിയ പതിപ്പിന്റെ വില.

പേര് സൂചിപ്പിക്കുന്നതു പോലെ തന്നെ പൂര്‍ണമായും കറുപ്പ് നിറത്തില്‍ മുങ്ങിയാണ് വാഹനം വിപണിയില്‍ എത്തിയിരിക്കുന്നത്. യുവാക്കളെ ലക്ഷ്യമിട്ടാണ് വാഹനം വിപണിയില്‍ എത്തിച്ചിരിക്കുന്നത്. പുതിയ കളര്‍ ഓപ്ഷനൊപ്പം തന്നെ കുറച്ച് അധിക ഫീച്ചറുകളും പുതിയ പതിപ്പില്‍ ഇടംപിടിച്ചിട്ടുണ്ട്.

വാഹനം വാങ്ങാന്‍ ആഗ്രഹിക്കുന്നവര്‍ക്കായി ഡല്‍ഹിയില്‍ നടക്കുന്ന ഒരു പൊതുചടങ്ങില്‍ വാഹനത്തെ അവതരിപ്പിക്കുമെന്നും കമ്പനി അറിയിച്ചു. പുറമേ ഗ്ലോസ് ബ്ലാക്ക് നിറമാണ് കമ്പനി നല്‍കിയിരിക്കുന്നത്. അകത്തളവും ബ്ലാക്ക് നിറത്തിലാണ് ഒരുങ്ങുന്നത്. ഹൈ ഗ്ലോസ് ബ്ലാക്ക് ക്രോമിലാണ് സ്പിരിറ്റ് ഓഫ് എക്സ്റ്റസി ചിഹ്നം.

വാഹനത്തിന്റെ ഗ്രില്ലിനും ഗ്ലോസ് ബ്ലാക്ക് നിറം തന്നെയാണ് കമ്പനി നല്‍കിയിരിക്കുന്നത്. 22 ഇഞ്ചാണ് ഇതിലെ അലോയി വീല്‍. ചുവപ്പ് നിറത്തിലാണ് ബ്രേക്ക് കാലിപേഴ്സ്. വശങ്ങളിലും അകത്തും നേര്‍ത്ത മഞ്ഞ ലൈനുകളും പുതിയ പതിപ്പിന്റെ സവിശേഷതയാണ്.

സ്യൂയിസൈഡ് ഡോറും പിന്നിലെ വ്യൂയിങ് സ്യൂട്ടും കള്ളിനനിനെ വ്യത്യസ്തമാക്കും.വ്യൂയിങ് സ്യൂട്ട് സ്വിച്ചിട്ടാല്‍ ബൂട്ട് തുറന്ന് രണ്ട് കസേരകളും ചെറിയ മേശയും പുറത്തേക്ക് വരും. 6.75 ലിറ്റര്‍ (6,750 സിസി) ഇരട്ട-ടര്‍ബോ V12 എഞ്ചിനാണ് വാഹനത്തിന്റെ കരുത്ത്.

ഈ എഞ്ചിന്‍ 600 bhp കരുത്തും 900 Nm torque ഉം സൃഷടിക്കും. പുതിയ പതിപ്പ് വിപണിയില്‍ ഉള്ള പതിപ്പില്‍ നിന്നും കൂടുതല്‍ കരുത്തും, ടോര്‍ഖും ഉത്പാദിപ്പിക്കും. വിപണിയില്‍ ഉള്ള മോഡല്‍ 571 bhp കരുത്തും 850 Nm torque ഉം ആണ് ഉത്പാദിപ്പിക്കുന്നത്.

എട്ട് സപീഡ് ഓട്ടോമാറ്റിക്കാണ് ഗിയര്‍ബോക്സ്. റോള്‍സ് റോയ്സ് നിരയിലെ ഗോസ്റ്റ്, ഡോണ്‍, റെയ്ത്ത് എന്നീ മോഡലുകള്‍ക്കും പ്രത്യേക ബ്ലാക്ക് ബാഡ്ജ് പതിപ്പുകള്‍ നേരത്തെ കമ്പനി അവതരിപ്പിച്ചിരുന്നു.

വിരലില്‍ എണ്ണാവുന്ന വാഹനങ്ങള്‍ മാത്രമാണ് കമ്പനി വിപണിയില്‍ വില്‍പ്പനയ്ക്ക് എത്തിച്ചതും. നാല് സീറ്റര്‍, അഞ്ച് സീറ്റര്‍ ഓപ്ഷനുകളില്‍ വാഹനം വിപണിയില്‍ ലഭ്യമാകും. ഏതു കഠിന പ്രതലവും ആഢംബരത്തോടെ കീഴടക്കാന്‍ തങ്ങളുടെ എസ്‌യുവിക്ക് കഴിയുമെന്നാണ് കമ്പനിയുടെ അവകാശവാദം.

മണിക്കൂറില്‍ 250 കിലോമീറ്റര്‍ വേഗത്തില്‍ വരെ കുതിക്കാന്‍ റോള്‍സ് റോയ്‌സ് കലിനാന് കഴിയും. ഓള്‍ വീല്‍ ഡ്രൈവ് ഒരുങ്ങുന്ന ആദ്യ റോള്‍സ് റോയ്സ് മോഡല്‍ കൂടിയാണ് കലിനന്‍. ഏതു പ്രതലവും താണ്ടാന്‍ പ്രത്യേക ഓഫ്റോഡ് ബട്ടണ്‍ കലിനനിലുണ്ട്.