തിരുവനന്തപുരം: പ്രതീക്ഷിച്ചതിലും വൈകി കേരളത്തിൽ ഇന്ന് കാലവർഷം ആരംഭിക്കുമെന്ന് മുന്നറിയിപ്പ്. കന്യാകുമാരി തീരത്തുള്ള കാലവർഷം ഇന്ന് കേരളത്തിലെത്തും. നിയുള്ള ദിവസങ്ങളിൽ ശക്തമായ മഴയുണ്ടാകുമെന്നാണ് മുന്നറിയിപ്പ്.
ആദ്യം മഴ കിട്ടുക തെക്കൻ കേരളത്തിലായിരിക്കും.കാലവർഷത്തിന്റെ ആദ്യപകുതിയിൽ മികച്ച മഴ ലഭിക്കുമെന്നാണ് പ്രതീക്ഷ. നാളെയോടെ അറബിക്കടലിൽ ചക്രവാതച്ചുഴി രൂപപ്പെടുകയും ഇത് പിന്നീട് ന്യൂനമർദ്ദമായി മാറുകയും ചെയ്യും. പതിയെ തുടങ്ങുന്ന കാലവർഷ ന്യൂനമർദ്ദം പശ്ചിമ തീരത്തേക്ക് നീങ്ങിയാൽ മഴ മെച്ചപ്പെട്ടേക്കും. ബംഗാൾ ഉൾക്കടലിലും ന്യൂനമർദ്ദം രൂപപ്പെടാൻ സാധ്യതയുണ്ട്. ഇരട്ട ന്യൂനമർദ്ദം കാലവർഷം സജീവമാക്കും.
അറബിക്കടലില് എതിര് ചക്രവാതച്ചുഴി രൂപപെട്ടിരിക്കുന്നതിനാൽ കേരള തീരത്ത് കാറ്റ് ശക്തമാവാൻ ഇനിയും ദിവസങ്ങളെടുക്കുമെന്നും കാലവർഷം വൈകുമെന്നുമാണ് കുസാറ്റിലെ കാലാവസ്ഥാ വിദഗ്ധർ പറയുന്നത്. പസഫിക്ക് സമുദ്രത്തിലെയും ഇന്ത്യൻ മഹാസമുദ്രത്തിലെയും ചുഴലിക്കാറ്റുകളുടെ സാന്നിധ്യമാണ് കാലവർഷം എത്തുന്നത് വൈകിപ്പിച്ചത്. മെയ് 26ന് ശ്രീലങ്കൻ കരയിലെത്തേണ്ടിയിരുന്ന കാലവർഷം കര തൊട്ടത് ഏഴ് ദിവസം വൈകി ജൂൺ രണ്ടിനാണ്. നിലവിൽ ലക്ഷദ്വീപ്, കോമോറിൻ തീരത്തായുള്ള കാലവർഷത്തിന് കേരളാതീരത്തേക്ക് എത്താൻ അനുകൂല സാഹചര്യമാണെന്നാണ് കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നത്.