ഛാബുവ: ലോക് സഭാ തെരഞ്ഞെടുപ്പിൽ ബിജെപി 370ലധികം സീറ്റുകൾ നേടുമെന്ന് പ്രധാനമന്ത്രി നരേന്ദ്ര മോദി. കോൺഗ്രസ് ഗോത്ര വിരുദ്ധരാണെന്നും തെരഞ്ഞെടുപ്പ് സമയത്ത് മാത്രമാണ് ജനങ്ങളെക്കുറിച്ചും കർഷകരെക്കുറിച്ചും ചിന്തയുള്ളതെന്നും മധ്യപ്രദേശിലെ ഛാബുവയിൽ ഗോത്ര സമുദായാംഗങ്ങളുടെ പൊതുസമ്മേളനത്തിൽ അഭിപ്രായപ്പെട്ടു.
ഗുജറാത്ത്, രാജസ്ഥാൻ എന്നീ സംസ്ഥാനങ്ങളുമായി അതിർത്തി പങ്കിടുന്ന ജില്ലയാണ് ഛാബുവ. ഗോത്ര വിഭാഗമാണ് ഇവിടെ ഭൂരിപക്ഷം.2019ൽ നടന്ന ലോക്സഭ തെരഞ്ഞെടുപ്പിൽ സംസ്ഥാനത്തെ 29ൽ 28 സീറ്റിലും ബിജെപി വിജയിച്ചിരുന്നു. ഗോത്ര സംവരണ സീറ്റുകൾ മുഴുവൻ നേടിയതും ബിജെപിയായിരുന്നു.
ബിജെപിയുടെ താമരചിഹ്നം 370ലധികം സീറ്റുകൾ നേടുമെന്ന് തനിക്ക് ഉറപ്പുണ്ടെന്ന് മോദി പറഞ്ഞു.ലോക്സഭ തെരഞ്ഞെടുപ്പിൽ ബിജെപിക്ക് 370 സീറ്റുകളിൽ വിജയിക്കാൻ ഓരോ ബൂത്തുകളിലും 370 വോട്ട് കൂടി അധികം ഉറപ്പാക്കണം. ബിജെപി നേതൃത്വം നൽകുന്ന എൻഡിഎ 400 സീറ്റുകളിലധികം നേടുമെന്ന് പാർലമെൻ്റിൽ പ്രതിപക്ഷ നേതാക്കളടക്കം പറഞ്ഞുതുടങ്ങിയെന്നും മോദി പറഞ്ഞു.
കോൺഗ്രസ് അധികാരത്തിലിരുന്നപ്പോൾ കൊള്ളയടിച്ചു. അധികാരത്തിന് പുറത്തുള്ളപ്പോൾ ഭാഷയുടെയും പ്രദേശത്തിൻ്റെയും ജാതിയുടെയും അടിസ്ഥാനത്തിൽ ഭിന്നിപ്പുണ്ടാക്കുന്നു. സ്വന്തം പാപങ്ങളിൽ കോൺഗ്രസ് മുങ്ങിപ്പോയിരിക്കുകയാണ്. അതിൽനിന്ന് എത്രത്തോളം ഉയർന്നുവരാൻ ശ്രമിക്കുന്നുവോ അത്രത്തോളം താഴേക്ക് വീഴുകയാണ്. വരാനിരിക്കുന്ന ലോക്സഭ തെരഞ്ഞെടുപ്പിൽ കോൺഗ്രസ് തുടച്ചു നീക്കപ്പെടുമെന്നും മോദി പറഞ്ഞു.