തിരുവനന്തപുരം: ലോക ഹൃദയദിനാചരണത്തിന്റെ ഭാഗമായി മെഡിട്രീന ആശുപത്രിയും നാലാഞ്ചിറ സെന്റ് ജോൺസ് മോഡൽ ഹയർ സെക്കൻഡറി സ്കൂളും ചേർന്ന് രണ്ട് ലോക റെക്കോർഡുകൾ സ്വന്തമാക്കി. 310-ഓളം വിദ്യാർഥികളെ അണിനിരത്തി ഹൃദയത്തിന്റെ ആകൃതിയിൽ മനുഷ്യച്ചങ്ങല തീർത്ത് ലൈവ് കാർഡിയോ എക്സർസൈസ് അവതരിപ്പിച്ചതാണ് ഒരു റെക്കോർഡ്. മെഡിട്രീന ആശുപത്രി ചെയർമാനും ചീഫ് ഇന്റർവെൻഷണൽ കാർഡിയോളജിസ്റ്റുമായ ഡോ. എൻ. പ്രതാപ് കുമാറിന്റെ അന്താരാഷ്ട്ര കാർഡിയോളജി സേവനത്തിനാണ് രണ്ടാമത്തെ റെക്കോർഡ് അംഗീകാരം.
‘ചലിക്കുന്ന ഹൃദയം’
ഹൃദയാരോഗ്യത്തെക്കുറിച്ചുള്ള അവബോധം യുവതലമുറയിലേക്ക് എത്തിക്കുക എന്ന ലക്ഷ്യത്തോടെയാണ് 310-ഓളം വിദ്യാർഥികളെ പങ്കെടുപ്പിച്ച് ഹൃദയത്തിന്റെ ആകൃതിയിൽ മനുഷ്യച്ചങ്ങലയും ലൈവ് കാർഡിയോ എക്സർസൈസും സംഘടിപ്പിച്ചത്. മെഡിട്രീന ആശുപത്രിയും സെന്റ് ജോൺസ് മോഡൽ ഹയർ സെക്കൻഡറി സ്കൂളും സംയുക്തമായാണ് പരിപാടി സംഘടിപ്പിച്ചത്.
ഡോ. എൻ. പ്രതാപ് കുമാറിന് റെക്കോർഡ്
17 രാജ്യങ്ങളിൽ ഇന്റർവെൻഷണൽ കാർഡിയോളജി നടപടിക്രമങ്ങൾ നടത്തിയതിനാണ് ഡോ. എൻ. പ്രതാപ് കുമാറിന് ലോക റെക്കോർഡ് അംഗീകാരം ലഭിച്ചത്. ഇന്ത്യയ്ക്ക് പുറമെ മലേഷ്യ, ബ്രൂണൈ, ശ്രീലങ്ക, ബംഗ്ലാദേശ്, നേപ്പാൾ, മാലദ്വീപ്, ഫിലിപ്പീൻസ്, ടാൻസാനിയ തുടങ്ങിയ രാജ്യങ്ങളിൽ സങ്കീർണമായ ഹൃദയചികിത്സാ നടപടിക്രമങ്ങൾ നടത്തുന്നതിനും അവിടുത്തെ കാർഡിയോളജിസ്റ്റുകൾക്ക് പരിശീലനം നൽകുന്നതിനുമായി അദ്ദേഹം ക്ഷണിക്കപ്പെട്ടിട്ടുണ്ടെന്ന് അധികൃതർ അറിയിച്ചു.
നാലാഞ്ചിറ സെന്റ് ജോൺസ് മോഡൽ ഹയർ സെക്കൻഡറി സ്കൂളിൽ നടന്ന ചടങ്ങിൽ വേൾഡ് റെക്കോർഡ്സ് യൂണിയൻ റെക്കോർഡ്സ് മാനേജർ ക്രിസ്റ്റഫർ ടെയ്ലർ ക്രാഫ്റ്റും വേൾഡ് റെക്കോർഡ് ക്യൂറേറ്റർ പ്രജീഷ് നിർഭയയും നേട്ടങ്ങൾ പരിശോധിച്ച് അംഗീകരിച്ചു. തുടർന്ന് ക്രിസ്റ്റഫർ ടെയ്ലർ ക്രാഫ്റ്റ് റെക്കോർഡ് പ്രഖ്യാപിക്കുകയും സൈറ്റേഷൻ കൈമാറുകയും ചെയ്തു.
മെഡിട്രീന ആശുപത്രി ചെയർമാൻ ഡോ. എൻ. പ്രതാപ് കുമാർ പരിപാടി ഉദ്ഘാടനം ചെയ്തു. സ്കൂൾ പ്രിൻസിപ്പൽ ബിജു കെ. ജോർജ് അധ്യക്ഷത വഹിച്ചു. സീനിയർ കാർഡിയോളജിസ്റ്റ് ഡോ. മനു ഹൃദയദിന സന്ദേശം നൽകി. മെഡിട്രീന ഗ്രൂപ്പ് ഓഫ് ഹോസ്പിറ്റൽസ് സി.ഇ.ഒ ഡോ. മഞ്ജു പ്രതാപ്, ഫാ. നിധീഷ് വള്ളിയത്ത്, ബിജു ജോൺ, അജീഷ് കുമാർ ആർ.സി. തുടങ്ങിയവർ പങ്കെടുത്തു.
