കോഴിക്കോട്: കുറ്റ്യാടി പൊലീസ് സ്റ്റേഷനിൽ ഡ്യൂട്ടിക്കിടെ ഇന്നലെ രാവിലെ മുത‌ൽ സ്റ്റേഷനിൽ നിന്ന് കാണാതായ പൊലീസുകാരനെ മരിച്ച നിലയില്‍ കണ്ടെത്തി. സിവിൽ പൊലീസ് ഓഫീസർ പാതിരിപ്പറ്റ മൈത്രി ബസ് സ്റ്റോപ്പിന് സമീപം മാവുള്ള ചാലിൽ സുധീഷ് (41) ആണ് മരിച്ചത്.തെരച്ചിലിൽ സ്റ്റേഷന് സമീപം ടി ബി റോഡിൽ മൈജിക്ക് അടുത്തുള്ള കെട്ടിടത്തിന്റെ ആളൊഴിഞ്ഞ പാർക്കിങ് ഗ്രൗണ്ടിൽ തൂങ്ങി മരിച്ച നിലയിൽ കണ്ടെത്തുകയായിരുന്നു.
സുധീഷിന്റെ മൃതദേഹം സംഭവ സ്ഥലത്ത് നിന്ന് മാറ്റുന്നത് നാട്ടുകാർ തടഞ്ഞിരുന്നു.രാത്രിയിൽ ഇൻക്വസ്റ്റ് നടത്തിയതിന് പിന്നിൽ ദുരൂഹതയുണ്ടെന്ന് നാട്ടുകാർ ആരോപിക്കുന്നു.ഉന്നത പൊലീസ് ഉദ്യോഗസ്ഥർ സ്ഥലത്തെത്തണമെന്ന് ആവശ്യപ്പെട്ടായിരുന്നു പ്രതിഷേധം.ചിട്ടി കമ്പനി തട്ടിപ്പ് കേസ് ക്രൈംബ്രാഞ്ചിന് കൈമാറിയ സാഹചര്യത്തിൽ അന്വേഷണ സംഘത്തിലുണ്ടായിരുന്ന സുധീഷ് കേസ് ഫയൽ അപ്ഡേറ്റ് ചെയ്യുന്നതുമായി ബന്ധപ്പെട്ട് മാനസിക സമ്മർദത്തിലായിരുന്നുവെന്ന് പറയപ്പെടുന്നു.