മലപ്പുറം: നഗരാരോഗ്യ കേന്ദ്രത്തിന് കെട്ടിടം നിർമിക്കാനുള്ള സ്ഥലം പാണക്കാട് തങ്ങൾ കുടുംബം സൗജന്യമായി വിട്ടുനൽകി. പാണക്കാട് തങ്ങൾ കുടുംബത്തിന്റെ കുടുംബസ്വത്തിൽ നിന്നാണ് മലപ്പുറം-പരപ്പനങ്ങാടി പാതയോരത്ത് ഭൂമിക്ക് ഉയർന്ന വിലയുള്ള ഭൂമി സൗജന്യമായി മലപ്പുറം നഗരസഭയ്ക്ക് വിട്ടുനൽകിയത്.
പാണക്കാട് തങ്ങൾ കുടുംബം പുരാതനകാലം മുതൽ പ്രയാസമനുഭവിക്കുന്നവർക്ക് സ്വന്തം നിലക്കും അല്ലാതെയും സമാധാനം പകർന്ന മഹത്തായ പാരമ്പര്യത്തിന്റെ അവകാശികളാണെന്ന് ഹമീദലി ശിഹാബ് തങ്ങൾ അധ്യക്ഷത വഹിച്ച യോഗത്തിൽ മുസ്ലിം ലീഗ് ദേശീയ ജനറൽ സെക്രട്ടറി പി കെ കുഞ്ഞാലിക്കുട്ടി ഭൂമി കൈമാറ്റ ചടങ്ങ് ഉദ്ഘാടനം ചെയ്ത് പറഞ്ഞു.
സ്ഥലത്ത് കേന്ദ്രസർക്കാറിന്റെ സാമ്പത്തിക സഹായം ഉൾപ്പെടെയുള്ളവ ലഭ്യമാക്കി പരമാവധി വേഗത്തിൽ ആധുനിക സൗകര്യങ്ങളോടു കൂടിയ നഗരാ രോഗ്യ കേന്ദ്രം നിര്മിക്കുമെന്ന് നഗരസഭാ ചെയർമാൻ മുജീബ് കാടേരി അറിയിച്ചു.പാണക്കാട് സാദിഖലി ശിഹാബ് തങ്ങളുടെ വീട്ടുമുറ്റത്ത് നടന്ന ചടങ്ങിൽ രജിസ്റ്റർ ചെയ്ത ആധാരം നഗരസഭ ചെയർമാൻ മുജീബ് കാടേരിക്ക് കൈമാറി. മലപ്പുറത്തിന്റെയും സമീപ പ്രദേശങ്ങളിലെയും പൊതുസേവന സ്ഥാപനങ്ങൾക്കും സംവിധാനങ്ങൾക്കും പാരമ്പര്യമായി തന്നെ ഇത്തരം സ്ഥലസൗകര്യങ്ങൾ ഉൾപ്പെടെ നൽകാൻ കഴിഞ്ഞതിൽ പാണക്കാട് കുടുംബത്തിന് എന്നും സന്തോഷം മാത്രമാണുള്ളതെന്ന് സാദിഖലി തങ്ങൾ പറഞ്ഞു.