ക്വീൻസ്ലാൻഡ്: എല്ലാ ദിവസവും സ്വന്തം കിടപ്പുമുറിയിലേക്ക് അപരിചിതരെ അടക്കം ക്ഷണിക്കുന്ന ഒരു യുവതി സോഷ്യൽ മീഡിയയിൽ വൈറലാകുകയാണ്. വെറുതെയല്ല, താൻ കിടക്കുന്ന കട്ടിലിൻ്റെ പാതിഭാഗം വാടകയ്ക്ക് കൊടുക്കുകയാണ് ഓസ്ട്രേലിയൻ സ്വദേശിനിയായ മോണിക്ക് ജെറമിയ.എന്ന 36കാരി. ഹോട്ട് ബെഡ്ഡിങ് എന്ന് സൈബർ ലോകത്ത് അറിയപ്പെടുന്ന ഈ ട്രെൻഡ് ദിവസക്കണക്കിലാണ് വാടക ഈടാക്കുന്നത്.
മുൻകാമുകനുമായി പിരിഞ്ഞതിനുശേഷം തൻ്റെ കിടക്കയുടെ പകുതിയോളം ഭാഗം കാലിയാണെന്നും ഈ ഭാഗമാണ് താൻ വാടകയ്ക്ക് കൊടുക്കുന്നതെന്നും മോണിക് പറയുന്നു.ഇത് എല്ലാവർക്കും യോജിച്ച രീതിയല്ലെന്നും ലൈംഗികബന്ധത്തെക്കാൾ ഉപരി ആളുകളുടെ കഴിവിലും ബുദ്ധിയിലും ആകൃഷ്ടരാകുന്നവർക്കു മാത്രമേ ഹോട്ട് ബെഡ്ഡിങ് നടത്താനാകൂ എന്നും മോണിക്ക് ചൂണ്ടിക്കാണിക്കുന്നു. സമൂഹമാധ്യമങ്ങളിൽ അധികം പ്രചാരം നേടിത്തുടങ്ങിയിട്ടില്ലെങ്കിലും ഇതുസംബന്ധിച്ച് മോണിക്ക് ടിക്ടോക്കിലിട്ട വീഡിയോ ഇതിനോടകം ഏഴരലക്ഷത്തോളംപേർ കണ്ടു.
കിടക്കയുടെ പാതി വാടകയ്ക്ക് കൊടുക്കുന്നു എന്നതുകൊണ്ട് എന്താണ് ഉദ്ദേശിക്കുന്നതെന്ന് കൃത്യമായി ഇരുകൂട്ടർക്കും അറിയാമെങ്കിൽ ഇത് നല്ലൊരു വരുമാനമാ‍ർഗമാണെന്ന് മോണിക് പറയുന്നു. ഒപ്പം കിടക്കുന്ന വ്യക്തിയെ പൂർണമായി ബഹുമാനിക്കുകയും മറ്റൊന്നും പ്രതീക്ഷിക്കാതിരിക്കുകയും ചെയ്യണം.ഇരുകൂട്ടരും പരസ്പരം സ്വകാര്യതയും മൂല്യങ്ങളും അതിർവരമ്പുകളും ബഹുമാനിക്കണം. രണ്ട് കിടക്കകളുള്ള ഒരു മുറി അതിഥിയുമായി പങ്കുവെക്കുന്നതുപോലെ തന്നെയാണിതും. പക്ഷേ, ഇവിടെ ഒരു കട്ടിലിലാണ് കിടക്കേണ്ടത്.മോണിക്ക് പറയുന്നു.
ഹോട്ടൽ മുറികളുടെ അടക്കം വാടക കുതിച്ചുയർന്ന സാഹചര്യത്തിൽ പഞ്ചനക്ഷത്ര ഹോട്ടൽ മുറിയുടെ വലുപ്പമുള്ള തൻ്റെ കിടപ്പുമുറി ഒട്ടും മോശമല്ലെന്നാണ് യുവതി പറയുന്നത്. ഒരാഴ്ചത്തേക്ക് 160 ഡോളറിനു മുകളിലാണ് മോണിക്ക് ഈടാക്കുന്നത്. ഒരുമാസം 640 ഡോളറിലധികം വരുമാനം ലഭിക്കും. തൻ്റേത് വളരെ മനോഹരമായമുറിയാണെന്നും ഹോട്ടൽ മുറിയിൽ കിടന്നുറങ്ങുന്നതുപോലെ ഇവിടെ കഴിയാമെന്നും മോണിക്ക് പറയുന്നു.
വിദേശത്തുനിന്ന് എത്തുന്ന വിദ്യാർഥികൾക്ക് താമസസൗകര്യം ഏർപ്പാടാക്കുന്ന ബിസിനസായിരുന്നു ക്വീൻസ്ലാൻഡ് സ്വദേശിനിയായ മോണിക്കിന്.കൊവിഡ് 19 ലോക്ക്ഡൗണിൽ വിദ്യാർഥികളുടെ വരവ് നിലച്ചതോടെ മറ്റെന്തെങ്കിലും വരുമാനമാർഗം കണ്ടെത്താതെ തരമില്ലെന്നായി.അങ്ങനെയാണ് മോണിക്ക് വേറിട്ട രീതി പരീക്ഷിക്കാൻ തീരുമാനിച്ചത്. ഹോട്ട് ബെഡ്ഡിങ് രീതി, വരുമാനമാർഗം മാത്രമല്ല, ഒറ്റപ്പെടൽ ഒഴിവാക്കാനും തന്നെ സഹായിക്കുന്നുണ്ടെന്ന് മോണിക്ക് പറയുന്നു.
തൻ്റെ ആദ്യ അതിഥിയായി ക്ഷണിച്ചത് മുൻകാമുകനെയായിരുന്നു. മുൻകാമുകൻ പണം നൽകി രണ്ടുവട്ടം തന്നോടൊപ്പം കിടന്നുറങ്ങിയിട്ടുണ്ടെന്ന് മോണിക്ക് പറയുന്നു. ജീവിതച്ചെലവുകൾ കുതിച്ചുയർന്നതോടെ ഓസ്ട്രേലിയയിൽ നിരവധിപ്പേർ ഹോട്ട് ബെഡ്ഡിങ് ആരംഭിച്ചിട്ടുണ്ടെന്നാണ് റിപ്പോർട്ടുകൾ.