ആലപ്പുഴ: യുവകവി ഹരിലാൽ ഐക്കരയെ വീടിനുള്ളിൽ മരിച്ച നിലയിൽ കണ്ടെത്തി. ഫോൺ വിളിച്ചപ്പോൾ കിട്ടാതിരുന്നതോടെ കതക് ചവിട്ടിപ്പൊളിച്ച് അകത്തു കടന്ന നാട്ടുകാരാണ് ഹരിലാലിനെ മരിച്ച നിലയിൽ കണ്ടെത്തിയത്. നാൽപ്പത്തിമൂന്ന് വയസായിരുന്നു. അവിവിഹാഹിതനായ ഇദ്ദേഹം വീട്ടിൽ ഒറ്റയ്ക്കാണ് താമസിച്ചിരുന്നത്.
ബിഗ് ബോസ് ടെലിവിഷൻ ഷോയിൽ പരീക്കുട്ടി പാടിയ ‘ഒരു കിളിയായിരുന്നെങ്കിൽ’ ഞാൻ എന്ന കവിത എഴുതിയത് ഹരിലാൽ ആയിരുന്നു. ഈ കവിത സോഷ്യൽ മീഡിയയിൽ വലിയ രീതിയിൽ വൈറലായിരുന്നു. വള്ളികുന്നം മഠത്തിലയ്യത്ത് ജംഗ്ഷന് സമീപം കളീക്കൽ തെക്കതിൽ വീട്ടിലായിരുന്നു ഹരിലാൽ താമസിച്ചിരുന്നത്. വെള്ളിയാഴ്ച ഉച്ചയോടെ ഫോൺ എടുക്കാത്തതിനെ തുടർന്ന് വീട്ടിലെത്തി പരിശോധിച്ച നാട്ടുകാർ കതക് അകത്തു നിന്ന് പൂട്ടിയിരിക്കുകയാണെന്ന് കണ്ടെത്തുകയും ഉടനെത്തന്നെ പഞ്ചായത്തംഗത്തെ അറിയിക്കുകയുമായിരുന്നു.
കതക് ചവിട്ടി പൊളിച്ച് അകത്ത് കടന്നപ്പോൾ ഹരിലാലിനെ സോഫയിൽ മരിച്ച നിലയിൽ കണ്ടെത്തുകയായിരുന്നു. ഹരിലാൽ കരൾ രോഗ ബാധിതനായിരുന്നു എന്നാണ് റിപ്പോർട്ട്.