പാലക്കാട് : കോട്ടായില് മൂന്ന് വയസുള്ള കുഞ്ഞുമായി ആത്മഹത്യക്ക് ശ്രമിച്ച യുവതി മരിച്ചു. കരിയംകോട് മേക്കോൺ സുരേഷിന്റെ ഭാര്യ വിൻസി (37) ആണ് മരിച്ചത്.ഐസ്ക്രീമില് വിഷം ചേര്ത്ത് കഴിക്കുകയായിരുന്നു.മകള് തൃശൂര് മെഡിക്കല് കോളജ് ആശുപത്രിയില് ചികിത്സയിലാണ്.
പത്തുദിവസം മുന്പ് ഭര്ത്താവ് സുരേഷ് വീട്ടിലില്ലാതിരുന്ന സമയത്താണ് ഭര്തൃവീട്ടില് വച്ച് ബിന്സി ജീവനൊടുക്കാൻ ശ്രമിച്ചത്. വൈകിട്ട് ഭര്ത്താവ് വീട്ടിലെത്തിയപ്പോള് ബിന്സിയെയും കുഞ്ഞിനെയും മുറിയില് അബോധാവസ്ഥയില് കണ്ടെത്തുകയായിരുന്നു. പാലക്കാട് ജില്ലാ ആശുപത്രിയില് എത്തിച്ച ഇവരുടെ നില ഗുരുതരമായതിനാൽ തൃശൂര് മെഡിക്കല് കോളജിലേക്ക് മാറ്റി. ഇന്ന് രാവിലെയാണ് ബിന്സി മരിച്ചത്.
പതിനൊന്ന് വര്ഷം മുന്പായിരുന്നു സുരേഷിന്റെയും ബിന്സിയുടെയും വിവാഹം. ആത്മഹത്യയുടെ കാരണം വ്യക്തമല്ല.പൊലീസ് അന്വേഷണം ആരംഭിച്ചു. കുഞ്ഞ് അപകടനില തരണം ചെയ്തതായും ആരോഗ്യസ്ഥിതിയില് പുരോഗതിയുണ്ടെന്നും ഡോക്ടര്മാര് പറഞ്ഞു.